تفريغ: تعلم اللغة الأسبانية للمبتدئين من الصفر - الدرس الاول -المقدمة

[MAROO541]

Hola Amigos
Yo soy Ibrahim y estás viendo el curso de español en Taleek.

السلام عليكم ورحمة الله وبركاته ، أنا إبراهيم عادل وانت بتتفرج على كورس تعلم اللغة الاسبانية على طليق.
طليق هو أول تطبيق عربي مختص بتعليم كل اللغات على إيد مدرسين محترفين ،
تقدر تحمله من على متجر جوجل أو أبل وتختار اللغة اللي انت عاوز تتعلمها وتبدأ من الصفر الى مرحلة الطلاقة .
اسم طليق اصلًا مأخوذ من الطلاقة
تقدر تتعلم إنجليزي ، فرنسي ، صيني ، ألماني ، أسباني ، تركي ، روسي ولغات تانية بإذن الله
مجانًا .
طيب ده كورس الأسباني اللي بناخدك فيه من الصفر إلي التحدث كالمتحدث الأصلي للغة ،
أنا هكون معاك فيه بصفة رئيسية في أول مستوى، ومن المستوى التاني هيكون فيه مساعدة من مدرسين تانيين عرب وأسبان.
أنت لو عاوز تتعلم أسباني بسبب سفر ، جامعة ، أو عشان تغني Despacito بهزر طبعًا
فا الكورس ده كويس جدًا علشانك؛ لأننا بنبني عندك اللغة من أساسها تقوم تتقدم فيها بسرعة.
على عكس معظم الكورسات مبنتبعش هنا أي طرق أكاديمية مملة ، ولكن المنهج بتاعنا تفاعلي ؛ عشان نقدر نخليك تتكلم في أسرع وقت وبــــطلاقة.
يعني ايه الكلام ده ؟
يعني مش هتلاقيني بقولك بص عندنا نظامين من حاجة أسمها فعل الكينونة ،
وعندنا تصريفات الأفعال بتعمل الشكل الفولاني، ولا احفظ معايا ان كذا بيجي بعدها كذا
لا مفيش أي حاجة من دي أبدًا.
شغل التركيبات الكيميائية و المعامل ده مينفعش هنا ولا أنصحك به .
انت هنا هتتعلم بنفس الطريقة اللي الطفل الأسباني بيتعلم بيها لغته ، وكل حاجة بتكون منطقية في دماغك من اول يوم،
وده معناه ايه ؟
معناه ان زي ما الطفل الأسباني بيلقط ويردد ، انت كمان محتاج تلقط وتردد.
الدروس تفاعلية زي ما قلت لك، أثناء الدرس لما أقولك ده دورك قول انت كذا ترجم كذا ردد كذا، لازم تردد بصوت عالي وتدرب معايا وإلا مش هتلاقي أي نتيجة وتكون بتضيع وقتك .
سؤال أنا سمعت ان الأسباني صعب ؟
الاجابة: صح، انت سمعت صح الأسباني صعب …على اللي قالك انو صعب، متبقاش بقي تاخد رأيه تاني الأسباني سهل جدًا ومفهوش تعب
أصلًا في تشابه كبير بينه وبين اللغة العربية ،

تعرف مثلًا كلمة السكر معناها ايه بالأسباني ؟
يعني azúcar

لا واللهِ السكر يعني أثُكر، طب والملح أملح ؟
لا مش للدرجة دي متأڤورش ، في كلمات كتير متشابهة بين العربي و الأسباني هناخدها مع بعض و هتسهل عليك التذكر.
كمان القواعد بتاعته ماهياش بعبع ولا حاجة، هتلاقيني مقسم لك الكورس ده تقسيمه سهلة جدًا ،
وكل مرة بتخرج من الدرس بمعلومة تبني بيها الدرس اللي بعده وتحس ان اللغة دي راكبة على بعضها بطريقة منطقية أوي مفيهاش حفظ ابدًا .
الأسباني فيه بعض اللهجات زيه زي أي لغة، الشائع منهم أكتر هو: لهجة أسبانية ، و يليها أمريكا اللاتينية .
ولكن بأيهما أتحدث ؟ فانت هتتفهم في كل حتة عادي .
احنا هنا على طليق هندرسك اللهجة الأسبانية بتاعت أسبانية اللي هي الـــ Cstilian
(Castilian Spanish)
ولكن أي مثال هناخدوا وأي معلومة هدهالك، لو في أختلاف بينها في اللهجة وبين اللهجة اللاتينية هتلاقيني بوضحلك ده وبشاورلك عليه .
فا أنت هتكون عارف الاتنين وتقدر تتكلم بــاللي يريحك فيهم، ولكن هتسمعني أنا معظم الوقت بتكلم باللهجة بتاعت أسبانية .
خد بالك من حاجة بقي المنهج الأسباني انا مقسمهولك مستوايات، وكل مستوي مقسمه وحدات.
بعد نهاية كل وحدة لازم تعمل حاجتين مهمين أوي :
-أول حاجة تراجع كل الكلمات من خلال الـــ Flash cards على التطبيق
زي مانت شايف كده

أعمل لكل مستوي أسباني فولدر خاص به، فولدر للمستوي الأول فولدر للمستوي التاني وهكذا

داخل كل فولدر اعمل قائمة منفصلة، لكل وحدة انت بتتعلمها
قبل ما تنتقل من وحدة للتانية لازم تكون قرأت ، راجعت ، واختبرت نفسك في الكلمات دي
طبعًا على التطبيق زي مانت شايف كده كل قائمة تقدر تختبر نفسك فيها و تقدر تراجعها بالصوت وتقرأها.

-تاني حاجة تجتاز الاختبار بتاع الوحدة وانت حاسس انك بتتكلم عربي ،
اختبار الوحدة ده محدد بوقت ، ولازم تجتازه قبل نهاية الوقت بتاعه كأنه سباق ،
هتقهم الاختبار ده بيمشي ازاي لما يجي وقته .

بس يا سيدي لو طبقت الحاجتين دول مع الترديد والتفاعل أثناء الدرس
مبروك عليك الأسباني إن شاء الله ، ما شاء الله لايقين على بعض
مطولش عليك بقي أكتر من كده و مستنيك في اول درس عشان نبدأ رحلة التعلم، Adiós
شكرًا على المشاهدة والسلام عليكم ورحمة الله وبركاته .