皆さん、こんにちは。タリークの日本語座のマリヤ厶です。
السلام عليكم ورحمة الله وبركاته، أنا مريم محيي وانت بتتفرج على كورس اللغة اليابانية من طليق.
الفيديو الـ فات اتفرجنا على اللغة اليابانية ومميزاتها واي الـ بتختلف فيه عن اللغات التانية، وقلنا انها بتستخدم 3 أبجديات فاكرينهم! 
1- Hiragana 3- Katakana 2- Kanji
في فيديو النهارده هنبدأ بقى بأول أبجدية وهي الهيراجانا.
وزي ما قولنا المرة الـ فاتت دي الأبجدية اليابانية الأساسية الـ هنستخدمها تقريباً في كل حاجة.
الـ Hiragana عبارة عن 46 حرف. لحظة بس متتخضش!
مش صعبيين زي ما انت فاكر؛ لأنه زي ما قولنا كل حرف بيعبر عن الصوت الـ بيتنطق بالظبط. فالكتابة والقراءة مش هتكون صعبة.
كدا عندنا أصوات بنعبر عنها بحروف، تمام؟
طب هل هي أصوات ساكنة ولا متحركة؟ يعني إيه اصلا صوت ساكن أو متحرك؟ 
تعال ناخد مثال بالعربي:
←لو قولت كلمة باب من غير ما أحطها في جملة ولا أي حاجة. لو شكِّلناها هنلاقي( بَابْ) الباء الأولانية مفتوحة فبقيت صوت متحرك، بمعنى إني أضفتله حركة سواء بقى فتح أو ضم أو كسر بالنسبة للغة العربية، وهنلاقي الباء التانية ساكنة يعني اتنطقت كدا (بْ) لا فتحتها ولا كسرتها ولا جيت جنبها خالص.
←طب بالنسبة للياباني؟
اللغة اليابانية كلها أصوتها متحركة؛ وبالتالي الحروف الـ بتعبر عن الأصوات دي حروف متحركة ما عدا حرف واحد بس ساكن؛ لأنه بيعبر عن صوت ساكن وهو ( ん) ودا آخر حرف في الهيراجانا.
أول خمس حروف معانا هم الـ 5 أصوات الأساسية المتحركة وهم ( a-i-u-e-o) وباقي الأبجدية بتتكون من صوت ساكن+ صوت متحرك من الخمسة دول.
طيب يعني إيه الـ أنا قولته دا؟ تعال نشوف مثال يوضحلنا أكثر.
صوت الـ k لما أضيف ليه a بقى صوت متحرك بيتنطق ka
ونكمل مع باقي الأصوات:
K+i= ki•
K+u=ku•
K+e=ke•
K+o=ko•
دا كان نطق أول عشر حروف في الهيراجانا.
a i u e o
Ka ki ku ke ko
وباقي الحروف هتبقى بنفس النظام كدا، سهل الموضوع؟
⇇طب يلا نرجع للخمس حروف الأولانيين ونشوف بيتكتبوا ازاي 
بس قبل ما نبدأ كتابة، لازم نعرف إن خطوات كتابة الحروف اليابانية بتتكتب من الشمال لليمين ومن فوق لتحت زي ما هنشوف دلوقتي ودا في باقي الأبجديات كمان.
• أول حرف معانا وهو あ وزي ما إحنا شايفين أول خط من الشمال لليمين وتاني خط من فوق لتحت، 3خطوات لكتابة الحرف あ.
طب إحنا ليه بنلتزم بإننا نكتب بالترتيب دا؟ عشان الحرف يطلع متناسق وشكله حلو. يعني مثلا عندنا في اللغة العربية بنتكتب حرف الياء كدا (ي) لو جربنا نكتبه بالعكس كدا هيطلع شكله غريب. نفس الفكرة في أي لغة برضو نخلي بالنا من طريقة الكتابة عشان خطنا يطلع شكله حلو.
كدا كان أول حرف معانا إيه ! بالظبط あ.
• تاني حرف هو い وبيتكتب بالشكل دا خطوتين من الشمال لليمين. كدا اتعلمنا حرفين تخيلوا نقدر نكون منهم كلمه! إيه هي؟ あい ومعناها حب:heart: شوفتوا الدنيا سهلة ازاي؟
اتعملنا كلمة ياباني من أول حرفين بس!!
• تالت حرف معانا う وانا بنطقه بفتح بوئي حاجة بسيطة ومش بحرك شفايفي خالص ولا بضمهم،وبيتكتب بالشكل دا خطوتين برضو، الخطوة الـ فوق الأول وبعدين الـ تخت زي ما قولنا
•رابع حرف معانا هو え وبيتكتب بالشكل دا من فوق لتحت برصو ونخلي بالنا إن الحزء الـ تحت بيتكتب في خطوة واحدة مش إتنين.
كدا حرفين كمان ونقدر برضو نكون منهم كلمة وهي うえ ومعناها فوق أو على. 
كدا لحد دلوقتي إحنا اتعملنا كلمتين فاكرين أول كلمة؟
•あい→ ومعناها حب
طب تاني كلمة معناها اي ؟ صح
•うえ→ ومعناها فوق أو على
•آخر حرف معانا お وانا بنطقه بدور شفايفي بحيث مغلطش وانطقه u وبيتكتب على تلات خطوات زي ما شايفين كدا. أنا حاسه إنه يشبه لحرف لسه واخدينه ياترى كان انهي واحد؟ فاكرين؟
تمام حرف الـ あ نخلي بالنا بقى عشان منتطلغبطش بينهم.
あ お
الـ على الشمال دا あ=a ،والـ علي اليمين دا お=o
طب إيه رأيكم نحطهم في كلمة عشان يبقى سهل نفتكرهم؟
كلمة あお بمعنى اللون الأزرق💙.
ودلوقتي هنراجع الحروف سوا وهيبقى معاك وقت تكرر النطق.
あ い う え お
وزي ما قولنا حرف الـ う مش بضم فيه الشفايف، وحرف お هو الـ بنضم فيه الشفايف كدا O
كرر النطق كدا! وبكدا نكون خلصنا أول خمس حروف هيراجانا. إيه رأيكم نراجعهم سوا بسرعة؟ هيظهر حرف ومعاك مدة 3 ثواني تقول نطقه إيه وبعدها هنقول النطق عشان تتأكد من إجابتك يلا بينا…
う お え あ い
جميل… كدا عرفنا أول خمس حروف نطقهم عامل إزاي وطريقة كتابتهم.
طب دلوقتي هنكتبهم ازاي على الكمبيوتر أو الموبايل ؟ 
طريقتهم سهلة جداً، هننزل الكيبورد الياباني على الموبايل والكمبيوتر بالطريقة دي :
↤بالنسبة للموبايل هتلاقي اللغات الموجودة كدا (العربي والإنجلش) هنروح على الإعدادات هنا بعدين نختار ( languages أو لغات) بعدين نختار add keyboard بعد كدا نكتب Japanese في السيرش، هيظهرلنا كدا هنلاقي ظهرلنا أربع كيبوردات.
↲الـ مكتوب فيهم بالياباني مش عمليين أوي فهنختار الإتنين دول، هنلاقيهم ظهروا مع العربي والإنجلش كدا. نرجع بقى ونجرب نكتب … زي ما انتم شايفين الحروف انجلش بس لما بندوس عليها بتكتب ياباني بالشكل دا. ندوس على a هيظهرلنا あ، مثلا i نفس النظام い
كلمة あおالـ لسه واخدينها هتظهر بالشكل دا .
↲تاني كيبورد هنقدر نكتب فيها بإدينا أو بقلم، وهتنفع لما نتعلم الكانجي. مثلا لو فيه كانجي مش فاكرين نطقه بس عارفين شكله هنكتبه بالشكل دا وهيظهرلنا.
↤وبالنسبة للكمبيوتر: هنروح ف السيرش نختار إعدادات اللغة وندوس على add preferrd language وبعدين نكتب Japanese برضو في السيرش، هيظهرلنا ونختار next هنلاقي متعلم على حاجات الكيبورد دي، هي كدا تمام نسيبها زي ما هي وندوس in store هنلاقي ظاهرلنا في ليستة اللغات الـ على الكيبورد كدا ولما نيجي نكتب هنحول اللغة الـ عاوزين نكتب بيها الياباني من هنا ، هتظهر كدا، وبعدين ندول على حرف a عشان يكتبه كدا あونكتب زي كيبورد الموبايل بالظبط.
كدا خلصنا حلقة النهاردة، متنسوش تشوفوا الملخص بتاعها على التطبيق والـ مجمع كل النقط الـ تكلمنا عنها وكمان هتلاقي sheet فيه طريقة كتابة الحروف الـ خدناها تقدر تطبعه وتتدرب على كتابة الحروف زي ما انت عايز.
شكراً للمشاهدة واشوفكم على خير في الحلقة الجاية إن شاء الله، مع السلامة.