السلام عليكم يا أبطال كورس الإنجليزية المتوسط B1،
سأكتب كلامي لكم بالعامية هذه المرة علشان تتخيله ك فيديو 
عارفين إنكم بتواجهوا تحديات كتير في رحلتكم لتعلم اللغة الإنجليزية، وده شيء طبيعي جدًا. كلنا مرينا بالمراحل دي قبل كده. يمكن تحسوا إن الدروس دسمة شوية وفيها مفردات كتير وأمثلة متعددة، خاصة مع تنزيل حلقة جديدة كل يوم. وممكن ده يخليكم تحسوا ببعض الضغط أو الإرهاق.
بس خلوني أقولك على حاجة:
مفيش داعي نهائي إنكم تلتزموا بجدول معين أو تحسوا إنكم لازم تخلصوا حلقة كل يوم. كل واحد فينا ليه وتيرته الخاصة في التعلم. يعني لو حاسس إن حلقتين في الأسبوع كفاية بالنسبة ليك، تمام جدًا! وده تقدم ممتاز, المهم إنك تفهم الدروس كويس وتتمرن عليها علشان تترسخ في دماغك.
إحنا بنركز على زيادة المفردات في المستوى ده علشان نساعدكم ترفعوا مستواكم وتبقوا قادرين تتعاملوا مع اللغة بثقة أكبر. مش عايزينكم تحسوا إنكم واقفين في مكانكم أو مش قادرين تتقدموا. وبنمشي على نفس منهجية النظام الأوروبي في معايير الكفاءة في اللغة الإنجليزية، علشان نوفر لكم أفضل تجربة تعلم ممكنة.
وعلشان نسهّل عليكم الأمور أكتر، بنحب نبشركم إن التحديثات الجاية لتطبيق طليق هتتضمن قسم خاص لمراجعة الكلمات والتدرب على الكلمات الصعبة اللي ممكن تنسوها.
وصدقني, انا وانت وكل الناس بما فيهم المتحدث الأصلي بينسى مفردات. والا مكانش في تعبيرات زي - الكلمة على طرف لساني. أحيانا بتبقى مش لاقي الكلمة مع انك استخدمتها زنجبار ومتين الف مرة. مبتحصلش معاك في العربي؟ فلما تنسى, معلش - اعرف انك إنسان والإنسان من النسيان
وفي النهاية، متنسوش تستمتعوا بالرحلة. التعلم مش سباق، ومش لازم نخلص بسرعة. خدو وقتكم واستمتعوا بكل درس وكل كلمة جديدة بتتعلموها. كل خطوة بتقربكم من هدفكم، ومهما كانت صغيرة فهي مهمة.
إحنا معاكم في كل خطوة، ومتأكدين إنكم هتوصلوا لأهدافكم. لو عندكم أي استفسارات أو حابين تشاركوا تجربتكم، متترددوش. إحنا أسرة واحدة وبندعم بعض.
شدوا حيلكم، ومستنيين نشوف إنجازاتكم!
